Konpainia

DAB dantza konpainia, 2022an sortua, dantza garaikideko konpainia bat da, gorputza, memoria, lurralde eta emozio partekatuen espazio gisa ulertzen duena. Bere hizkuntza koreografikoak, estetika zaindua eta giza dimentsio sendoa uztartzen ditu, mugimenduaren, musikaren eta presentzia eszenikoaren arteko etengabeko elkarrizketa bilatuz. Marina Eskisabel eta Iker Sanzen zuzendaritzapean, konpainiaren helburua, dantza publikoarengana hurbiltzea da, gizarte eta kultura gaiak lantzen dituzten proiektuen bidez, sormen, bitartekaritza eta topaketarako espazioak sortuz.

Konpainiaren lana, osagarri diren hiru ardatzetan egituratzen da: konpromiso soziala eta berrikuntza artistikoa uztartzen dituzten dantza garaikideko ikuskizunen sorkuntza; museo eta kultura espazioetan garatutako tailer eta bisita dantzatuen bidez ondarearekin harreman berriak aktibatzea; eta ongizatea ardatz duten proiektuak, non mugimendua autoezagutza, autoestimua eta lotura kolektiboak indartzeko tresna bihurtzen den. Hiru ildo hauen bidez, DABek artea eta gizatasuna lotzen dituzten esperientzia sentikorrak eraikitzen ditu.

Konpainiaren izenak bere lan-filosofia laburbiltzen du: DAB, Dantza, Arte eta Bitartekaritza. Dantza konpainiaren disziplina da eta gainerako hizkuntzak antolatzeko oinarria; Arteak beste diziplina artistikoekin etengabeko elkarrizketa adierazten du; eta Bitartekaritzak funtsezko lekua hartzen du, sorkuntzaren, testuinguru sozialaren eta komunitatearen arteko loturak sortzeko.